مهندس ایرج شهین باهر آرتیردی: کئچن ۳۰ ایلده اولکه میزین هئچ بیر شهرینده گئجه قوندو و شهرلرین حاشیه سینده یارانان غیر استاندارد ائولری استانداردلاشدیرماق اوچون هئچ بیر ایش گورولمه ییب دیر.
تبریز بلدیه رئیسی تبریز بازرگانی ، تجارت و صنعت اتاقی ایله تبریز اسلامی شوراسینین مشترک جلسه سینده بو مسئله یه توخوناراق آرتیردی: مسکن و شهرچیلیک ناظرلیگینین (وزارتخانه) وئردیی معلوماتا گوره اولکه سطحینده ساده جه تبریز شهری غیر رسمی و حاشیه ده تیکیلن ائولرین احیا ائتمه سی اوچون عملی آددیم آتیب دیر.
مهندس شهین باهر آرتیردی: البته تبریزین گئجه قوندو و حاشیه محله لرینده تیکیلن ائولرین ساییسی آز و ۱۷۰ واحد آپارتمان دیر آما عینی حالدا تبریز ائله بو قونو دا ایراندا بیرینجی رتبه یه مالک دیر و هئچ بیر شهرده زلزله قاباغیندا دایاناجاغی اولمایان ائولری احیا ائتمک اوچون بیر آددیم گوتورلمه ییب دیر.
او دئدی: بو ۱۷۰ واحد آپارتمان، ۲۰ مین غیر استاندارد ائوله مقایسه ده چوخ آز دیر آنجاق تبریز ائله بو تعداد آپارتمان تیکمه سی ایله اولکه ده بیرینجی رتبه ده دیر.