«میر اعتماد عمادی» تبریز و کربلا شهرلرینین قارداشلیق مقاوله سینه استناد ائدرک، حسینی اربعین زائرلرینه خدمت گوسترمه یین کئچمیش ایللره گوره داها دا عظمتلی و آغیر اولدوغونو دئدی.
عمادی دئدی: بو ایل تبریز بلدیه سینین «جنت الحسین موکبی» تبریز اسلامی شوراسینین راضی لیقی ایله حرکته کئچدی و شهرین مدنی و اجتماعی پلان لرینی رعایت ائتمک اوچون گئنیش یاییلمیش خدمت برنامه لرینی نطرده توتوب و کربلا مسافرلرینی سفرینی آسانلاشدیرماغا سعی گوستریب.
تبریز بلدیه سینین اجتماعی رابطه لر و بین الملل علاقه لر مودورو، شهرداری موکبینه، «عتبات عالیات» دان خصوصی ایزین آلماغیندان خبر وئره رک تبریز بلدیه سینین ۳۰ نفر ایشچی سینین اربعین گونلرینده اربعین مسافرلرینه خدمت یئتریمگیندن خبر وئردی.
میر اعتماد عمادی دئدی: تبریز بلدیه سینین جنت الحسین (ع) موکبی کئچن ایل کیمی کربلا یانقین سوندورن اداره سینین قارشیسیندا و ۱۳۹۴نجو عمود دا استقرار تاپاجاق. بونونلا برابر کربلادا ۵ خیمه قورولاراق، ۳ مین نفر اسکان امکانی حاضیرالاناجاق.
او آرتیردی: موکبین مطبخی کربلادا ایشه باشلادیقدان سونرا هر گون ۳۰ مین پرس یئمک سحر ناهار و شام زامانی اربعین زائرلرینه بیشیریلیب پایلانیلاجاق.
میر اعتماد عمادی دئدی: حامام لار و توالت لرین قورولماسی، پالتار یوما و واکس قسمت لری ده موکب ده دایر اولاجاق. بونلارلا برابر ۳۰۰ مین سو شوشه سی ده موکب طرفیندن زائرلره پایلانیلاجاق.بونلارلا برابر عاشورا سپاهینین ایش بیرلیگی ایله برابر موکب ده چورک خانا برپا اولونوب گونده ۱۰ مین چورک حسین عاشیقلرینه پایلانیلاجاق.
تبریز بلدیه سینین اجتماعی رابطه لر و بین الملل علاقه لر مسئولو همچنین سوزلرینین سونوندا طیبی آبادانلیقلارین قورولماسی ایله بیرلیکده ایلک طیبی خدمت لر و داوا درمان لارین، احتمالی خسته لره تقدیم اولوناجاغیندان سوز آچدی.