محمد حسین اسحقی ژاپن بین الملل ایش بیرلیگی آژانسینین نماینده لری ایله گوروشده، بو اولکه نین توریسم صنعتینده باجاریقلی تجربه لرینه دئیینه رک آرتیردی: بو تجربه لردن فایدالانماق، توریسم انکشافینا چاتماق اوچون و تبریزی بیر توریسم مقصدینه چئویرمک ده بیزه چوخ یاردیمجی اوابیلر.
تبریز بلدیه رئیسینین فنی و عمرانی معاونی بو شهرین آسیا و یاخین شرقین سیاسی، اقتصادی و مدنی ده ییشمه سینده اولان رولونا دئیینه رک دئدی: تبریز شهری ایپک یولونون اورتا سیندا یئر آلان بویوک بیر تجار شهر اولاراق، چین و اروپانین تجاری مبادله لرینده مرکزی محوریتی وار ایدی.
او دئدی: تاریخ بویو، تبریز ایپک یولونون اهمیتلی دوراغی اولاراق چئشیدلی مدنیت لرین بیربیری ایله گورشوب و علاقه قورماق یئری رولونو اوینامیشدیر و ائله جه چوخ اهمیتلی اجتماعی و اقتصادی رول اوینامیشدیر.
اسحقی آرتیردی: بیر نئچه مدت سونرا تبریز، «۲۰۱۸نجی ایل اسلامی اؤلکه لرین توریسم پایتختی» حادثه سینه ائو صاحیبلیی ائده جک دیر و بو مسئله تبریزی دونیایا لایقینجه تانیتماق اوچون مهم بیر فرصت دیر.