شکور اکبرنژاد دئدی: تبریز ۲۰۱۸ بیزیم شهرده ایشسیزلیکی آرادان قالدیرماق اوچون دیرلی بیر فرصت دیر، نیه کی بوتون دونیادا توریسمین انکشافی ایله برابر چوخلو ایش فرصت لری یارانیر.
اکبرنژاد آرتیردی: ترکیه توریسمه لایقینجه توجه ائتمکله او اولکه ده ایشسیزلیک سویه سینی آزالداراق، توریسمین گوجلندیریلمه سی نتیجه سینده اقتصادیاتین باشقا قوللارینی دا گوجلندیردی.
تبریز شهرینین اسلامی شورا رئیسی دئدی: شرقی آذربایجانین بوتون شهر و ولایت مسئوللاری تبریز ۲۰۱۸ مسئله سینی ایش یاراتماق و توریسم صنعتینین گلیشمه سی اوچون بیر فرصته چئویرمک اوچون ال اله وئرمه لیدیرلر.
او تبریز شهرینین چئشیدلی احتیاجلارینا دئیینه رک آرتیردی: تبریزده چوخ ساحه لرده ایشله مه یه احتیاج اولسادا، مدنی ساحه لرده چالیشما هر زاماندان داها دا چوخدور. ایندی تبریز ده دونیانین باشقا دیللر و کولتور لری ایله تانیشماق قاچینیلماز دیر.
شکور اکبر نژاد دئدی: تبریز ۲۰۱۸ ده یاخشی ائو صاحیبی اولماق ایسته ییرسک، باشقا ملت لرین مدنیت، عنعنه، رسم و دب لری ایله تانیش اولمالییق. چون کی بیر سیرا داورانیش لار بیز عادی و طبیعی داورانیش لار اولا بیلر، آما عینی حالدا بو چئشید داورانیش لار باشقا ملت لر آراسیندا بی عیب و خوشا گلمز بیر داورانیش اولابیلر.