تبریزین بلدیه رئیسی، رسمی بیر اعلان دا، تبریز بلدیه سینین بوتون اجرایی حوزه لرینه ۱۰۰ میلیون تومن دن آرتیق اولان بوتون مقاوله لرین سیاهه سینی تبریز بلدیه سینین عمومی و اجتماعی پرتالیندا نشر اولونماسی اوچون سفارش و امر وئردی.
مهندس ایرج شهین باهرین وئردیگی بو رسمی اعلان دا؛ تبریز اسلامی شوراسینا وئریلن سوز اساسیندا و مالی و اجرایی حوزه لرین آیدین و دورو اولماسی اوچون، بوتون معاونت لر، منطقه بلدیه لری، شرکت لر و تشکیلات لار بو اعلانین نشر تاریخیندن ۱۰۰ میلیون تومن دن آرتیق مقاوله لری تبریز بلدیه سینین عمومی پورتالیندان نشر ائتمه لری واجیب بیلینیب.
تبریز بلدیه باشچی سی، تبریز بلدیه سینین بوتون قوللاری وحوزه لرینین بو اعلانا تابع اولاجاغینی وورغولاییب و آرتیریب: مقاوله لرین پورتال دا نشر اولونماسی، مقاوله نین آماجی، اجرا اولونماسی نین زامان و مدتی، مقاوله باغلانان شرکت لرین بیلگی لری و باشقا جزئیاتی دا پورتالدا نشر اولونمالی دیر.
تبریز بلدیه باشچی سی بو رسمی اعلانین اجرا اولونماسیندا بلدیه نین اجتماعی رابطه لر و بین الملل علاقه لر تشکیلاتینین داها آرتیق ایش بیرلیگی آپارماسینی دا وورغولاییب.