یاخین ایللرده عینالی داغی تبریز بلدیه سینین چالیشمالاری ندنی ایله تبریزین گورملی و گزملی یئرلریندن بیریسینه چئوریلیب.
بوردا یوزلر هکتارلیق یاشیل ساحه، چشیدلی تفریحی امکانلار، گوزل هاوا و مکانلار هر هفته ۵۰ مین نفردن چوخ تبریزلی و قوناغین بو داغا چیخماغا ماراقلاندیریر.
داغ گولو ائله عینالی نین هوندورلویونده یئرلشن یئنی بیر توریستی و تفریحی جاذبه دیر.
داغ گولو پروژه سی عینالی یاشیل ساحه سینین سو احتیاج لارینی تامین ائتمک له برابر بو گزمه لی مکانین نم و رطوبت سویه سینی داها دا چوخالدماق مقصدی ایله دیکیلیب.
داغ گولو پروژه سی ۴۵۰ مترلیک پیادا یولو و داش دوواری و دینج فضاسی ایله عزیز قوناقلار و وطنداشلارین بوش واختلاری اوچون راحات و دینج بیر یئر اولوبدور.
تبریز بلدیه سینه باغلی اولان عینالی توسعه و انکشاف تشکیلاتی و تبریز بلدیه سینین طبیعت پارکینین مودورولوگو، ۷ میلیارد تومان بو پروژه نین قورتاریلماسینه خرجله ییبدیر.