محمد حسین اسحقی، تبریزین چئشیدلی منطقه لریندن و محله لریندن گوروش ائتدیکدن سونرا دئدی: کئچن اون گونده، بوتون شهرده، آغیر حجیمده، خدمت و تمیزلیک ایشلری آپاریلدی و بو زحمت لرین نتیجه سینده تبریزین تمزیلیگی و گوزللیگینه داها دا آرتیریلدی.
تبریز شهرداری دئدی: عینی حالدا محرم آیینین اونونجو گونوندن سونرا، حسینی دسته لرین عزادارلیغینین سونلانماسی ایله برابر، تبریز بلدیه سینین زحمت چکن ایشچی لری، تعصب و جدیت له شهرین تمیزلیک ایشینی گئجه نی اول ساعتلاریندان باشلادیلار.
اسحقی آرتیردی: زائد داربست و دمیرلر، خیابانلاری تمیزلمه و یوما، بنرلری توپلاما، کاناللار و سو یوللارینی تمیزلمه، تبریز بلدیه ایشچی لرینین چالیشمالاریندان نمونه لردیر. بو چالیشمالار شهر خدمت بولومو ایشچی لرینین ایش بیرلیگی و تبریزین ۱۰ منطقه سی نین زحمت چکن لرینین امداشلیغی ایله گئجه نین اولیندن اجرا اولوندو.
تبریز بلدیه رئیسی، حسینی هئیت لرین و عزادار دسته لرین تبریز بلدیه سی ایله صمیمی همکارلیق و ایش بیرلیک لرینی بو ایلین متمایز خصوصیتی بیلیب آرتیردی: بو ایش بیرلیگین نتیجه سینده، زیبیل لرین توپلانما زامانی چوخ آزالیب و تنظیف ایشلرینین داها یاخشی اولدوغونا شاهید ایدیک.
مهندس اسحقی سوزلرینین سونوندا، زیبیل لرین یوزده ۲۰ آرتیلماسینی دئیه رک آرتیردی: تبریزده، نذر و احسان گلن گونلرده ده داوامی اولاجاق و تبریز بلدیه سینین شهر خدمت لری معاونتی و توللانتی و زیبیل لرینین اداره تشکیلاتیندان بو مسئله نی نظرده آلمالارینا تاکید ائتدی.